Мариа Мендеш и Национален Џез Оркестар

Националниот џез оркестар ве поканува на уште едно музичко патување.

На 25 март, 2025 година, во Македонската опера и балет, со почеток од 20 часот ќе можеме да ја видиме извонредната Мариа Мендеш, португалска пејачка и композиторка која живее во Холандија, која ќе настапи заедно со Националниот џез оркестар. Диригент на концертот ќе биде маестро Владимир Николов.

Музиката на Мендеш претставува уникатна мешавина од џез и португалска фадо музика, a нејзините изведби имаат добиено признанија од истакнати музички легенди како Квинси Џонс, Вејн Шортер и Хермето Пашкоал кои ја опишуваат како „џез пејачка од највисок ранг”.

Заедно со пијанистот и аранжер Џон Бизли, Марија Мендеш решава старите фадо нумери да ги изведе во модерно, џез руво – спој кој им носи 4 Греми номинации за двата албуми: „Close To Me” (2019) и „Saudade, Colour of Love” (2022). Токму вториот албум дополнително обработен за Биг Бенд оркестар од страна на Владимир Николов, Марија Мендеш и Јесе Пасение, ќе биде изведен во оваа специјална прилика, на концертот со Националниот џез оркестар.

Ве покануваме да бидете сведоци на една незаборавна вечер на музика, каде што богатиот оркестарски звук на Биг бенд оркестарот создава искри кога се среќава со возбудливата интеракција на страстниот глас на Мендеш, кој пее приказни за „saudade“, копнеж и љубов.